Програма за диплома (DP) за меѓународен бакалауреат (IB) е сет на ригорозни предуниверзитетски студии наменети за ученици на возраст од 16 до 19 години. Станува збор за двегодишна програма која има за цел да ги охрабри учениците да бидат љубопитни, постојано да бараат знаење, и да бидат грижливи и сочувствителни. Програмата дополнително става силен акцент на охрабрување на учениците да развијат меѓукултурно разбирање, слободоумност и ставови неопходни за да почитуваат и оценат низа гледишта.

Програмата е претставена преку шест академски области, кои го опфаќаат централното јадро. Учениците учат два современи јазици (или модерен и класичен јазик), предмет за хуманитарни или општествени науки, експериментална наука, математика и предмет од креативните уметности (наместо предмет за уметност, студентите можат и да изберат два предмети од друга област). Токму овој сеопфатен опсег на предмети ја прави програмата ригорозна, дизајнирана за ефективно да ги подготви учениците за влез на универзитет. Во секоја од академските области, учениците имаат флексибилност во правење на нивниот избор, што значи дека можат да изберат предмети што особено ги интересираат и кои потенцијално ќе сакаат да ги студираат понатаму на универзитет.

Вообичаено, три предмети (и не повеќе од четири) се полагаат на повисоко ниво (ПН), а другите се полагаат на стандардно ниво (СН). Програмата препорачува 240 наставни часа за предметите за повисоко ниво и 150 часа за стандардно ниво. Предметите на повисоко ниво се изучуваат во поголема длабочина и ширина отколку во стандардно ниво.

Покрај тоа, трите главни предмети од јадрото: Теорија На Спознанието (ТНС); Продолжена Есејска Задача (ПEЗ); и Креативност, Активност, Активизам (КАА) се задолжителни и централни за филозофијата на програмата. Овие предмети имаат за цел да го прошират образовното искуство на учениците и да ги предизвикаат да ги применат своите знаења и вештини.

 

 

ИБ ДП ЈАДРО

Продолжена Есејска Задача (ПЕЗ) е предмет што бара од учениците да се вклучат во независно истражување преку длабинско проучување прашања кои се однесуваат на предметите што се изучуваат во ДП. Опцијата за ПЕЗ Светски студии им овозможува на учениците да се фокусираат на тема од глобално значење, која тие ја испитуваат во рамките на најмалку два ДП предмети.

Теорија На Спознанието (ТНС) e предмет што развива кохерентен пристап кон учењето кој ги обединува академските дисциплини. Во овој предмет за критичко размислување, учениците ја истражуваат природата на знаењето и го продлабочуваат нивното разбирање за знаењето како човечка конструкција.

Креативност, Активност, Активизам (КАА) им помага на учениците да ги развијат сопствените идентитети во согласност со етичките принципи отелотворени во изјавата за мисијата на ИБ и ИБ профилот на ученик. Предметот ја надополнува интензивната академска програма на своевиден холистички начин, обезбедувајќи можности за самоопределување, соработка, достигнување и уживање, и ги вклучува учениците во низа активности паралелно со учењето во ДП. Трите насоки на предметот се креативност (истражување и проширување на идеите што водат до оригинален или толкувачки производ или изведба), активност (физички напор што придонесува за здрав начин на живот) и активизам (колаборативен и реципрочен ангажман со заедницата како одговор на автентична потреба).

 

ИБ ДП ПРЕДМЕТИ

Англиски јазик и литература ПН

Предметот по англиски јазик и литература има за цел да ја проучува сложената и динамична природа на јазикот и да ги истражи неговите практични и естетски димензии. Предметот ќе ја истражи клучната улога на јазикот во комуникацијата, одразувајќи го искуството и обликувањето на светот, како и улогите на самите поединци како производители на јазикот. Во текот на предметот, учениците ќе ги истражуваат различните начини на кои јазичните избори, типовите текстови, литературните форми и контекстуалните елементи влијаат врз значењето. Преку анализа на различни типови текстови и книжевни форми, учениците ќе ги разгледаат нивните сопствени интерпретации, како и критичките перспективи на другите, за да истражат како таквите позиции се обликувани од културните системи на верување и ќе научат да разговараат за значењата на текстовите.

Француски почетно ниво СН

Предметот по француски јазик и книжевност е предмет за усвојување јазик за студенти без претходно искуство со француски јазик или за студенти со многу ограничено претходно искуство. Учениците развиваат способност да комуницираат преку изучување на јазикот, темите и текстовите. Притоа, тие развиваат и концептуални сфаќања за тоа како функционира францускиот јазик. Комуникацијата се докажува преку рецептивни, продуктивни и интерактивни вештини низ низа контексти и цели кои се соодветни на нивото на предметот. Наставната програма е организирана во пет пропишани области: идентитети, искуства, човечка генијалност, социјална организација и споделување на планетата, и пропишува по четири теми за секоја од предметите.

Mатематика: анализа и пристапи СН

Предметот ја препознава потребата за аналитичка експертиза во свет каде што иновациите се сè повеќе зависни од длабокото разбирање на математиката. Фокусот е на развивање важни математички концепти на разбирлив, кохерентен и ригорозен начин, постигнат со внимателно избалансиран пристап. Учениците се охрабруваат да ги применат своите математички знаења за да решаваат апстрактни проблеми, како и оние поставени во различни значајни контексти. Предметот има силен акцент на способноста да се конструираат, комуницираат и оправдуваат точни математички аргументи. Учениците треба да очекуваат да добијат увид во математичката форма и структура и треба да бидат интелектуално подготвени за да ги вреднуваат врските помеѓу концептите во различни теми. Покрај тоа, тие учат да развијат и вештини потребни за да го продолжат својот математички раст во други средини за учење. Преку интерно оценувано истражување на учениците им се овозможува да развијат независност во математичкото учење. Во текот на предметот учениците се поттикнуваат да развијат обмислен пристап кон различни математички активности и да истражуваат различни математички идеи.

Дигитално општество ПН

Дигитално општество е интердисциплинарен курс во рамките на предметната група на поединецот и општеството. Курсот е наменет за млади луѓе заинтересирани да го истражат влијанието и важноста на дигиталните системи и технологии во современиот свет. Дигиталното општество е наменето за широк спектар на наставници по социјални студии, медиуми, хуманитарни науки, ИТ и сродни области.

Курсот ги интегрира концептите, содржината и контекстите преку истражување:

• Концептите како што се изразување, простор и идентитет нагласуваат моќни, продорни и дискутабилни перспективи кои обезбедуваат увид за истражување;
• Содржината информира за истражување со детали за дигитални системи, вклучувајќи области поврзани со податоци, алгоритми, медиуми, вештачка интелигенција, роботика и повеќе;
• Контекстите го поставуваат истражувањето во областите значајни за животот во дигиталното општество, вклучувајќи социјални, културни и еколошки контексти.

Курсот има за цел да ги поддржи учениците на стандардно ниво (СН) и повисоко ниво (ПН) на нивното патување за истражување бидејќи тие:

• Го фокусираат истражувањето користејќи концепти, содржина и контексти на курсот, како и примери од реалниот свет;
• Истражуваат различни извори релевантни за дигиталното општество;
• Истражуваат влијанија и импликации на дигиталните системи за луѓето и заедниците;
• Размислуваат за нови трендови, идни случувања и понатамошни сознанија;
• Споделуваат откритија за дигиталното општество со другите.

Бизнис mенаџмент ПН

Предметот е дизајниран да ги задоволи тековните и идните потреби на учениците кои сакаат да ги развијат своите знаења за деловните содржини, концепти и алатки, за да помогнат во донесувањето деловни одлуки. Идните вработени, деловните лидери, претприемачите или социјалните претприемачи треба да бидат самоуверени, креативни и сочувствителни агенти за промени за бизнисот на сè повеќе меѓусебно поврзан глобален пазар. Предметот за бизнис менаџмент е дизајниран да го поттикне развојот на овие атрибути. Преку истражување на четири интердисциплинарни концепти: креативност, промена, етика и одржливост, овој предмет ги овластува учениците да ги истражат овие концепти од деловна перспектива. Деловниот менаџмент се фокусира на деловните функции, процесите на управување и донесувањето одлуки во современи контексти на стратешка неизвесност. Учениците испитуваат како деловните одлуки се под влијание на фактори кои се внатрешни и надворешни за една организација и како овие одлуки влијаат врз низа внатрешни и надворешни чинители. Овој предмет ги подготвува учениците да бидат глобални граѓани подготвени да се соочат со предизвиците и можностите што ги чекаат во нашиот свет кој постојано се менува.

Биологија СН

Преку изучување на научен предмет од учениците се очекува да станат свесни за тоа како научниците работат и комуницираат едни со други. Додека научниот метод може да заземе широк спектар на форми, акцентот овде e на практичниот пристап. Дополнително, преку сеопфатната тема на „Природата на науката“ овие знаење и вештини ќе бидат ставени во контекст на начинот на кој науката и научниците во 21-от век работат и кои се етичките дебати и ограничувања на креативните научни напори. Науките се изучуваат практично. Учениците имаат можности да креираат истраги, да собираат податоци, да развијат манипулативни вештини, да ги анализираат резултатите, да соработуваат со врсниците и да ги оценуваат и да ги соопштат нивните наоди. Испитувањата може да се базираат на лабораторија или може да користат симулации и бази на податоци. Учениците ги развиваат вештините за самостојно работење на сопствен дизајн, но како дел од тим, вклучително и во соработка со училишта во различни региони, за да го отсликаат начинот на кој се спроведуваат научните истражувања во пошироката заедница.